Sermon Parhalado, Selasa 2 September 2020
![]() |
Photo : Illustrasi Yudas Saat Menyerahkan Yesus |
Thema Minggu IX Set Trinitatis, 06 September 2020 :
NDANG SITIGATIGAHONON JOLMA NA TINOMPA NI DEBATA
Nats Epistel : 1 Musa 37:23-30
Nats Evangelium : Mateus 27:1-10
Penyaji / Moderator : Vic. Pdt. R. Panjaitan, S.Th
Peserta Parhalado :
- St. G. Tampubolon
- St. T.P. Hutauruk
- St. A. Aritonang
- CSt. N.Matondang
- Pengantar/ Patujolo
Ia bukku Mateus on, on ma sada tulisan na ginurithon ni sahalak sian sisean ni Jesus na sampuludua i ima si Mateus, sahalak si jalo beo jala halak Levi do ibana. Jala bukku Mateus 27:1-10 on ma namanaringoti taringot tu Jesus na dipasahat tu panguhum si Latus laos diudut dohot hamatean ni si Judas. Dipatorang si Mateus do di bagasan turpuk on taringot tu panolsolion ni si Judas na manggadis Guru na ima Jesus tu akka sintua ni malim dohot sittua nibangso i laho mamusa Ibana. Thema minggutta ima na manaringoti tu sitiga-tigahon jolma. Masalah na maniga-nigahon/manggadis jolma nungnga adong mulai sian Padan na Robi jala na marragam do antong akka motivasina. Molo di epistel di patorang ima alani pangiburuon, gabe di gadis akka hahana si Josep. Manang songon dia pe alasan/motivasi ni na manggadis jolma tontu i sada ulaon bias-bias (kekejian). Manggadis jolma manang na didok eksploitasi tontu tujuanna laho mambuat keuntungan manang memanfaathon secara berlebihan. Songoni do nang si Judas, na pasahathon manang manggadis Jesus argana 30 rupia on ma antong na manggombarhon paboa na sahalak si haholongi hepeng ibana.
- Isi / Hatorangan Ni Turpuk
Ay 1-2 : ia akka sintua ni malim dohot sittua nibangso i, nungnga leleng di tahi rohana laho manakkup jala naeng manegai panghobasion ni Jesus, jala di ula nasida do akka marragam cara laho mandabuhon Jesus. Nga di dabu nasida uhum tu Jesus alai dang boi mardalam uhum i ala dang setuju pamarenta ni Rom, dungi dibahen nasida ma songon jebakan tu Jesus na mandok “na diorai Jesus mangalehon guguan tu Kesar i jala didok Raja Kristus do Ibana” (Luk.23:1-2) alai tong dang tolap nasida ala tung mansai bisuk do Jesus mangalusi nasida. Dungi gabe martahi ma akka sintua ni malim dohot sittua nibangso i tu si Judas laho pasahathon Jesus tu panguhum ni si Latus. Pemerintahan na marhuaso di nasida i ma bangso Rom na marhuaso di piga piga luat (benua) ima Afrika, Asia, dohot Eropa. Jadi laos nasida do na manontuhon halak tu panguhuman manang tu haluaon, jala tusi ma diboan nasida Jesus, tu adopan ni si Latus i. Tung pe dihasogohon roha nasida do bangso Rom i, alai holan asa sahat sangkap nasida laho mamusa Jesus dang pola maila angka malim i mangido pangurupion. Jala dimasa nuaeng pe sisongonon olo do jumpangta, gabe mardongan do na maralo hian, laho manaluhon alo demi kepentingan tertentu.
Ay 3 : si Judas Iskariot ima sada sian sisean naung pinillit ni Jesus mangihuthon Ibana disaluhut ulaon uju diportibi alai ndang porsea. Ndang alani na sogo rohana tu Jesus alai asa saut do sakkap ni rohana umbahen na pola olo ibana manggadis Jesus. Tagam roha ni si Judas na boi paluaon ni Jesus dirina sian tangan ni nasida manang na boi mambela dirina di adopan ni panguhum asa dipalua Ibana. Anggo di roha ni si Judas, marhitehon i gabe dapot ni Kristus ma kehormatan alai molo akka sintua ni malim dohot sittua nibangso i gabe murak, ibana dapotan hepeng jala dang adong annon na roa na naneng masa. Alai balik doi sude sian panagaman ni si Judas, dang tagam rohana na boi takkuponna Jesus jala ibana pe dang boi mangalo. Ulaon sisongonon pe olo do masa dingolutta, i ma na manggadis Tuhan Jesus marhite naung ditobus hita, taparsoada holan mangahut tu pardagingon dohot na mangharingkothon haportibion. Isara na pasidinghon haporseaonta laho mangulahon dosa, songon korupsi, pargabuson, bisuk ni portibi (kelicikan), ulaon harorangon, manang manadingkon huria laho mangulahon ulaon na maralo tu sangkap ni Debata.
Disolsoli ma rohana, lapatanna disi nungnga tung mansai marsak rohana, putus asa jala rimas tu dirina saddiri di tikki naung dirimangi ibana aha naung niulahonna. Di tikki na tar ela rohana lao manjehehon Guru na, si 30 rupia i mansai tung menggiurhon di ibana, alai holan panolsolion nama na ro tu ibana di na niulana i. “Kita tidak akan tahu betapa berartinya sesuatu sebelum kita kehilangan hal tersebut” on ma antong sada ungkapan na cocok manggombarhon panolsolion. Panolsolion dang hea ro di jolo alai na sai di pudi do antong dung adong na masa. Na denggan do antong molo adong panolsolion molo diuduti dohot hamubaon. Panolsolion on dihilala si Judas alai dipasae dohot cara na sala. Ibarat ni sahalak perampok na tartakkup jala dipasahat tu polisi, dung ditakkup ibana gabe manolsoli “boasa ma boi sappe tartakkup, seandaina ittor hatop au marlojong nakkin, dang dapot au”. Jadi panolsolion i dang na mandok “nga sala au, nga mardosa au manang marpamuati ma roham Tuhan marnida au” alai manolsoli pe alani na tardapot do. Di bagasan parngoluonta on pe godang do jolma manolsoli alai dang marhamubaon, alani manolsoli pe tong do diulahi muse hasalaan na i. Marhamubaon dang holan sebatas manolsoli alai ikkon adong do antong tekad naso ulahononna be hasalaan i jala ikkon lam tu denggan na tu joloan ni ari.
Ay 4-10 : na masa dung panolsolion ni si Judas. Na parjolo ima paulakhon hepengsi 30 rupia naung jinalona i tu akka sintua ni malim dohot sittua nibangso i di tikki na rappak nasida di jolo. Jala dipasahat si Judas do pengakkuanna na mandok “sala do au, hujehehon do hape naso marpipot”. Diakkui si Judas do ia mudar ni Kristus i ima mudar ni naso mardosa. Alai tabereng ma songon dia tanggapan ni akka sintua ni malim i, pola do ndang ringkot di halaki panolsolion ni si Judas Iskariot i, hape dipeop nasida do hamalimon, na marlapatan do ulaon hamalimon i gabe dalan ni bangso i tu Debata. Alai nungga dirajai sibolis roha nasida laho mandok: “Ndang ro di hami i, ho do na sari disi”. Di timpalhon si Judas ma perak i tu bagasan joro i, alai dang olo akka sintua ni malim i mambuat i muse ala mabiar nasida manuhuk dosa ni si Judas, didok roha ninasida na ikkon si Judas saddiri do mananggung i. Dang olo be si Judas manimpan i ala nungnga tung mansai borat di ibana laho manimpan i. Asa dung ditimpalhon perak i, sumurut ma ibana sian i laho maningkot. Dibuat akka sintua ni malim ma hepeng na ditimpalhon ni si Judas i tu arta ni joro jala didok “ndang jadi padomuon i tu arta ni joro, ai tuhor ni mudar do i”. Tuhor ni mudar na nidok ni nasida i lao pakkeonna mai manuhor tano manang ladang sian “pande hudon” na laho bahenon nasida gabe parbandaan (tempat penguburan) ni halak dagang jala digoari ma i “ladang mudar”.
Adong do nian sintong ni nasida ala dang dipadomu hepeng i tu arta ni joro alai sasintongna na mardosa nasida ala naung dibunu nasida Jesus naso marsala i pola sappe durus mudarNa. Anggo dipamerengan na burju marroha jala marparange na denggan akka sintua ni malim i hape sasudena i holan seremonial sambing (burju marugamo alai dang burju marTuhan). Songoni nang si Judas, naso dapotan haluaon. Alana aha? Alana dang holan na manjehehon Jesus, memang tung sude do jolma ma i mardosa. Jala sintong memang disolsoli ibana do pambahenanna, alai panolsolion i dang diihuthon dohot hamubaon ni roha. Maningkot, dang on dalan laho haruar manang lao pasaehon masalah. Ditikki na tasadari na mardosa hita maradophon Debata, ro ma hita tu Ibana, manopoti dosatta jala mangido hasesaon ni dosanta.- Refleksi / Sipahusor-husoron
Tung mansai godang do angka peristiwa na taadopi dipartikkian on i ma menyangkut persoalan-persoalan hajolmaon na lam tu rumang na. I ma angka ulaon hajahaton na olo mengorbanhon halak na asing holan asa tulus sangkap na sandiri dohot hauntunganna sambing. Boi do i manghorhon tu ulaon na mambahen donganna tu lombang (jurang kehancuran). I ma tarsingot hepeng, huaso/jabatan, manang angka na asing, taringot tu hagiot ni pardagingon. Human trafficking (perdagangan manusia), manang istilah Homo homini Lupus na marlapatan nungnga masa ulaon na marsiallangan jolma i dohot donganna jolma, i ma songon tudos-tudos na masa ro di partikkianon gabe sunggul sunggul di halak Kristen, patuduhon sikap dohot ulaon patuduhon paraloan tu angka praktek sisongoni. (Dalam sejarah kemanusiaan, ketika melakukan perdagangan manusia (human trafficking) demi tujuan eksploitasi, pelacuran/seks, penyalagunaan kekuasaan dan perbudakan akan ditindak pidana dengan UU No.21 Tahun 2007). Asa tung songon dia pe hauntungon na di hilala ni sasahalak sian ulaon na maniga-nigahon jolma tontu na dapotna do annon na paet upa na binahenna. Asa dung songoni, untagonan ma hita marsihaholongan ai nga dao ummuli i sian na marsihosoman. Godang dope angka namasa laho sibolusonta di portibi on taringot tu pangalaho na rumang. Alani asa manat hita dihaporseaontai, jala laho patuduhon hakristenon i marhite parange na niajarhon ni Kristus tu hita. Haroro ni Jesus tu portibion i ma laho patuduhon haluaon tu angka bangso, jala asa tarida ma parange ni Kristus i sian angka halak na manghaporseai Ibana. Amen.
Post Comment
Tidak ada komentar