Sermon Parhalado, Selasa 18 Agustus 2020

Photo : Illustrasi Tentang Menara Babel

 Thema Minggu X Set Trinitatis, 06 September 2020 : 

Manjamoti Diri Maradophon Hamajuon ni Zaman

Nats Epistel : 1 Musa 11:1-9

Nats Evangelium : 1 Korint 6:12-20

Penyaji / Moderator : Vic. Pdt. R. Panjaitan, S.Th

Peserta Parhalado :

1. St. D. Silaban
   
2. St. G. Tampubolon
3. St. T.P. Hutauruk
4. St. A. Aritonang
5. St. R. Pasaribu

• Pengantar/ Patujolo

Mungkin nga taboto sada falsafah di halak batak ima “falsafah poda na lima” mandok paias rohamu, paias pamatangmu, paias paheanmu, paias bagasmu, paias alamanmu. On ma antong sada poda napabotohon akka dia do naporlu tapaias di bagasan ngolutta siganup ari, jala na berkaitan do antong on sude. Sada sian poda i mandok paias bagasmu. Tontu dang adong jolma na manghalomohon bagasna rotak, alani do sai berusaha do hita laho manjaga haiason ni bagasta siganup ari asa nian sai ias, rapi jala nyaman hita tinggal di bagasta i. Suang songoni do nang haiason ni daging manang pamatangta, na porlu do tong parrohahononta alana peribahasa pe mandok “kebersihan pangkal kesehatan” Tasadari ma boi hita bertahan hidup jala mangula akka siulaonta be ima di tikki na hipas manangna berfungsi optimal do pamatangta. Mardomu tusi do apostel Paulus pasahathon tu hita di bagasan turpuk on, di tikki na porsea hita tu Kristus Tuhan dohot Sipalua hita, di tikki ima disahaphon tu hita Tondi Porbadia laos Tondi ima na maringanan di bagasan hita, alani dagingta gabe joro ni Tondi Porbadia. Ala joro ni Tondi Porbadia do dagingta on na ikkon botul-botul do tajaga haiasonna asa boi mian Tondi i dibagasan hita. Alai mansai jotjot do tarotaki joro ni Tondi Porbadia i jala tasegai marhite akka hagiot-hagiot portibi. Alani do dipaingot hita asa unang ma nian tapasahat ruas ni dagingta tu dosa na laho dipakke gabe sinjata ni hajahaton alai naeng ma nian tapasahat akka ruas ni dagingta on gabe sinjata ni hatigoran. Ai arga do hita ditobus, alani ikkon tapasangap ma Debata marhite dagingta.

• Isi / Hatorangan Ni Turpuk
  

Ringkot situtu ikkon attusanta ahado na masa manang latar belakang na terjadi di huta Korint. Huta Korint ima sada huta na ribur laos songon sada pusat Perdagangan di masa ni panghobasion ni Paulus. Ro do torop sian duru ni huta Korint mamboan angka tigatigana, laos torop do nang pangisi ni huta i gabe partigatiga disi. Tutu gabe denggan ma perkembangan ni perekonomian ni pangisi ni huta Korint, alai gabe hamoraonna i ma na mambahen nasida ndang tuk mangarajai diri gabe madabu tu bagasan dosa. Somalna do molo di sada kota na ribur, disi do masa mura tubu jala berkembang haormuson (pesta pora), pargadambuson (hawa nafsu) di siala na tersedia akka sarana na hombar tusi na mambahen jolma i mura tartait tu dosa. Lumobi ma di huria Korint hombar tu latar belakang dohot keadaan i, di naso tang dope haporseaon ni nasida. Huhut di na adong muse poda haliluon na mambahen akka hageduhon i asa gabe mangolu di hakristenon, holan laho mangoloi hagiot-hagiot ni rohana dohot hisap-hisap ni dagingna. Pangalaho i ma na mambahen gabe martamba akka parbolat-bolatan gabe laos masa ma akka pangalaho siula parmainanon (percabulan). Di bahen i gabe ditongos apostel Paulus ma podana marhite surat 1 Korint. Asa naeng ma tutu mangolu dohot mangula nasida angka ruas ni huria i di bagasan haporseaon di Jesus Kristus Sipalua i jala gabe siula Hata ni Debata.

      Didok apostel Paulus na saluhutna do jadi di ibana. Di sada sisi memang adong do sintong ni i, bebas do hita mangulahon manang aha alana saluhut halak Kristen ima akka halak naung pinalua (dibebaskan) ni Kristus. Sahalak Kristen dang be mangolu dibagasan parhatobanon. Alai, taparrohahon hata na mangihut “alai dang saluhut marguna”. On ma na pabotohon na dibagasan kebebasan na dilehon ni Debata i, adong do batasan na patut taantusi dohot denggan. Unang ala didok halak Kristen ima halak na porsea naung malua (merdeka) dibagasan Kristus, gabe boi hita marlomolomo di bagasan ngolutta. Alai na dilehon Debata do batasan tu hita di bagasan holong tu Tuhan i nang tu donganta jolma. Dipasahat apostel Pulus na mansai ringkot do di halak Kristen hatomanon (pengendalian diri) asa boi mangolu jala mangula Tondi ni Debata di ngolutta. Adong dua hal na disoroti apostel Paulus sian turpuk on na jotjot mambahen jolma i lepas kendali. Dia mai? Ima sipangangon dohot parmainanon na gabe songon kebutuhan ni daging. On do na masa di turpuk on, godang halak Korint na mengihuthon hagiot ni dagingna laos i ma na mambahen dirina dao sian Debata. Disarupahon nasida do parmainanon dohot sipanganon. Artina disi, molo diluluan sipanganon laho tu kebutuhan ni pamatangta nang songoni di kebebasan seksual gabe songon sada kebutuhan. Gabe dang adong be norma manang etika di nasida na jotjot gabe mambahen nasida tartait tu ulaon na ramun ima parmainanon. Tungpe sipanganon dohot seks na gabe kebutuhan ni daging, alai ikkon ma marhite unduk tu Tuhan i. Tapaloas ma dirinta dirajai Tondi ni Debata asa unang madabu hita tu parmainanon i.

Na naeng salpu do daging, pamatang nang sipanganon na tapangan i. Alai na so jadi ma tapangke dagingta on tu ulaon parmainanon saleleng mangolu hita di portibion. Ai Debata do naung manobus daging/pamatangta on sian uhuman ni dosa i, jadi nampuna ni Debata do sandok pamatang ro di tondinta pe. Ai tung mansai dangol do panghilalaan molo ndang adong na marnapunahon, termasuk ma hita manisia. Debata do nampunasa hita, na so jadi hita marlomolomo be di pamatang, daging, nang tondinta on. Ndada ahu be na mangolu i nuaeng; Kristus do mangolu di bagasan ahu. Ia mangolu pe ahu nuaeng di bagasan daging, mangolu marhitehite haporseaon di Anak ni Debata na manghaholongi ahu jala na mangalehon dirina humophop ahu (Gal.2:20). Jadi badia situtu do pamatangta on, na so jadi hita patunduhon pamatangta tu ulaon dosa, termasuk ma parmainanon songon na nidokna di bagasan turpuk on. Ai nang di PatikNa ima na papituhon didok do: Unang ho, mangalangkup! Na marlapatan: Ingkon dihabiari rohanta do Debata jala ingkon holong rohanta di Ibana, asa toman rohanta jala porman dohot pangalahonta ro di hatanta, ianggo angka naung marbagas i ingkon masiparhamaolan jala masihaholongan. Ndada holan i, nang pamatangta, pingkiranta dohot pangalahonta naeng ma nian mangulahon angka ulaon na hombar tu Patik/Hata ni Debata. Unang olo hita dielaela sibolis laho mangulahon ragam ni hageduhon.

 

Ai Kristus do Ulunta, hita angka halak Kristen ma ruas ni pamatang ni Kristus i. Ai naung dipadomu Debata do diriNa tu hita jolma pardosa marhitehite Tuhanta Jesus Kristus. Hita ma angka naung pinaluana i, jala paheheonNa do hita di ari sogot i songon Kristus naung jumolo hehe sian hamateanNa. Jadi, nasa naung pinalua ni Debata, ingkon hehe do sian pardosaonna manopot angka ulaon na denggan, ulaon hatiuron patuduhon naung tutu do ibana siihuthon Tuhanta Jesus Kristus. Ndang ulaon haholomon manang hageduhon be dihalomohon, alai angka ulaon na denggan nama. Na so jadi ibana saor tu angka ulaon parmainanon. Tanda hamauliateon ni rohanta di saluhut denggan basa dohot haluaon na balga na pinatupaNa i ima marhitehite pasangaphon Debata marhitehite daging dohot tondinta (totalitas parngoluonta ingkon pelehononta do tu Debata).

• Refleksi / Sipahusor-husoron
  

Hamajuon ni tekhnologi di portibion memang mansai hatop (sangat pesat). Di balik ni hamajuon na mamboan peningkatan tu ngolu ni jolma, adong bayang-bayang na golap na kemungkinan mamboan hamagoan (malapetaka). Molo tabereng do sisaonnari on, ia jolma nungnga be naeng menyerupai tuhan-tuhan kecil naboi mambahen hangoluon di bagasan laboratorium, manambai umur ni jolma manang na mangarimpashon pangisi ni portibion holan mamissit sada tombol. Disisi na asing taida dampak negatif ni hamajuaon ni zaman on ima hamajuon ni handphone na dipergunahon laho mamereng situs-situs porno na mambahen gabe sega pola pikir nang moral ni sasahalak. Gampang mambahen berita-berita bohong manang na hoax marhite akka media sosial. Hamajuon ni tekhnologi on mambahen hita sipata marpikkir songon dia nama perubahan ni portibion tu akka taon-taon na mangihut. Hamajuoan ni on mirip ma dohot tu na masa di tikki pembangunan menara Babel (epistel). Masipandohan nasida “tole tapungka ma sada hutanta, jala tapokkon sada tungkup, sungkot ro di langit punsuna, tabahen ma baritanta, asa unang marserak hita tu liat portibion”. Hita mangolu di zaman ima bangso manisia dipasada di bagasan bahasa tekhnologi dohot hagiot laho mangolu hombar tu lomo ni rohatta. Marlomba-lomba akka jolma laho mamakke tekhnologi na sarupa laho patoguhon dirina di haboionna. Manusia mulai mendewakan tekhnologi dalam segala segi kehidupan. On ma antong na sipata mambahen jolma i dang be bergantung tu Debata songon si najolo ala dihaporseai na boi do mamillit ngolu songon na dihalomohonna. Ndang na mandok hamajuon ni zaman on dang denggan di parngoluonta alai ikkon ringkot jala jamot do hita, ikkon boi ma hita mangarajai dirinta be asa unang madabu tu bagasan dosa.

Di zaman sisaonnari on, nga mansai maol luluan jolma na boi manjamothon dirina maradophon hamajuon ni zaman. Tarlumobi ma i akka halak naung gumodangan dalan ni ngoluna melenceng jala dang terkendali be. Boasa boi masa sisongonon? Alana memang motto ni ngolu ni sebagian jolma ima kenikmatan dunia sesaat.  Hombar tusi do surat ni apostel Paulus pabotohon tu hita tarlumobi songon sahalak Kristen hita na mangihuthon Kritus, asa lam tapajonok ma dirinta tu Tuhan i jala tapasangap ma ibana sian saluhut parngoluonta. Tapaias jala tapasuman dirinta dohot denggan ai na dapotonta do manfaat na balga sian na manjaga dohot mampareso dirinta. Alani tabahen ma na dumenggan tu dagingta on asa marhitehon i boi hita pasangaphon Debata. Tarsongon Epesus 5:29 mandok Ndang dung di dihosomi jolma dagingna, diparmudumudu do jala dipainu-inu, songon pambahenan ni Kristus tu huria i. Asa tapasiding ma parmainanon dohot akka na suman tusi i sian ngolutta, ai akka halak na mangarajai dirina mangadopi hamajuon ni zaman ido halak na mangantusi kebebasan na hombar tu lomo ni roha ni Debata. Taoloi ma hata ni Debata di bagasan unduk dohot biar ni roha. Amen