Sermon Parhalado HKI Jemaat Teluk Bakau, Selasa 22 September 2020

 

Photo : Illustrasi, Tuhan Yesus Menyembuhkan Orang Buta ( Yoh 9 : 3)

BAHAN SERMON HKI TELUK BAKAU RESORT BENGKONG ABADI
Minggu XVI Set Trinitatis, 27 September 2020

Ev. 2 Samuel 9:1-8                Ep. Lukas 14:12-14               SKP. Mat.25:40

Moderator & Penyaji : Vicar Pdt. R. Panjaitan, S.Th

Peserta :

1. St. G. Tampubolon
2. St. P. Pardede
3. St. R. Pasaribu
4. St. A. Aritonang
5. CSt. N. Matondang

 

MANGURUPI AKKA NA MARTIHAS/ KEPEDULIAN TERHADAP DISABILITAS

I.                Patujolo  

Disabilitas atau difabel adalah istilah yang meliputi gangguan, keterbatasan aktivitas, dan pembatasan partisipasi. Gangguan yang dimaksud adalah sebuah masalah pada fungsi tubuh atau strukturnya sehingga kesulitan dalam melaksanakan tugas atau tindakan. Istilah yang sering kita dengarkan pada penyandang disabilitas adalah “cacat” (fisik dan mental). Akan tetapi, seiring dengan perkembangan waktu mereka tidak lagi disebut cacat tetapi “disabilitas” sebagai seseorang yang memiliki kemampuan dalam menjalankan aktivitas berbeda (berkebutuhan khusus) yang perlu dibantu dan diperhatikan oleh orang yang normal karena mereka memiliki keterbatasan.  Marhite hatorangan on do antong dipaingot hita asa mangalehon kontribusi manghaholongi donganta jolma, secara khusus tu angka penyandang disabilitas. Dibagasan turpuk on taida songon dia si Daud patupahon holong na sian Debata I tu na humaliangna tarlumobi tu na martihas/disabilitas ima tu si Mepisobet na pangpang patna duansa. Asa hita pe taharingkothon ma manghaholongi/mangurupi donganta.

II.             Hatorangan ni Turpuk

Nga gabe sada kebiasaan na berlaku antong di tikki i molo sahalak raja na monang na ikkon rippashononna do sude keturunan ni raja sebelumna alana i dianggap songon sada ancaman di sada tikki na boi mangalo pamarenta ni raja naung tarpillit i. Alai molo taida di turpuk on dang diulahon si Daud antong sisongoni, dialo ibana do kebiasaan na masa di tikki i baliksa dipatuduhon do holong nai tu si Jonatan anak ni si Saul dohot tu si Mepiboset pahoppu ni si Saul. “Adong dope jolma tading-tading ni Raja Saul? asa hubaen asi ni roha tu Ibana (Ayt 1). Sukkun-sukkun on ma antong na pabotohon na tung mansai balga holong ni si Daud tu keluarga ni si Saul, nangpe si Saul menganggap ibana musuna ala di ingot ibana parale-aleon dohot padanna tu si Jonatan (1 Sam. 20:14-17). Satia do si Daud di padanna di adopan ni Debata, alani ndada holan hata sambing padan na i ndada holan tu jolma alai na umbalaga ima padan tu Debata na ikkon tontong ibana mangulahon na denggan tu saluhut pinompar ni si Jonatan ale-alena i.

 Molo sasintongna dihatahai nungnga botul-botul siap be sude keluarga ni si Saul, ndang mararga be keluarga ni si Saul di adopan ni bangso Israel. Alai dang tuk keberhasilan i laho mangalupahon akka na denggan jala dang gabe hasisiap ni keluarga i dalan laho mambolongkan nasida. Si Jonatan saddiri dang apala tarida na uli na denggan di hilala sian parale-aleonna dohot sian panghonghoponna maradophon si Daud uju di haposoonna. Alai burju ni roha ni raja Daud mangalului tading-tading ni si Saul dalanna laho mamalos na denggan sian na binahen ni si Jonatan uju di ngoluna. Dison ma jumpang hita sada parsiajaran na arga, unang mansohot hita mambahen akka na denggan. Atik pe dang na managam hita di balosna umbahen na taulahon na denggan, alai marhite turpuk on tarida ndang uju di ngoluna si Jonatan taruli na denggan, alai ianakhonna dapotan na denggan. Tupa do akka na denggan na tajalo sinuaeng, deba sian parbueni akka na denggan na sinuan ni akak natorasta.

Sian si Siba naposo isi ni bagas ni si Saul dapot ni si Daud panorangon na adong dope si Mepiboset di Lodebar di jabu ni si Makir anak ni si Ammiel. Si Mepiboset ima anak ni si Jonatan na martihas marhite na pampang duansa patna. Disuru si Daud do akka naposona laho mangalap si Mepiboset i asa boanonnna mangadop raja Daud. Atik pe nungnga gabe raja si Daud, ndang dihaginjanghon ibana dirina maradophon akka na asing tarlumobi tu pinompar sian si Saul dohot si Jonatan. Ala naung jumolo marujung ngolu si Saul dohot si Jonatan, tinggalma si Mepiboset na mangolu sian pinompar ni nasida. Atik pe martihas si Mepiboset i, dang leas roha ni si Daud marnida ibana, jala dihaholongi ibana do si Mepiboset songon jolma na asing naso martihas. Jala si Mepiboset pe ditanda do dirina nang hahurangan ni pamatangna, diboto ibana do ise na manghaholongi jala na marasi roha mida ibana ima raja Daud panggomgomi na tumimbo di Israel. Hata na lambok do sian raja Daud, suang songoni i si Mepiboset. Diparbaga-baga si Daud do pos ni roha asa unang mabiar si Mepiboset tu ibana jala naeng paulahon ni si Daud sudena ladang ni si Saul ompuna i, suang songoni ikkon sapangan do nasida di bagas ni raja i. Hata sapanganan, ima patuduhon holong ni roha, panarihonon di ngolu siapari, kesejahteraan naso jadi be anturaparon halak na rap dohot ibana. On ma na patuduhon serep  ni roha ni si Daud, na dietong ibana do si Mepiboset i halak na martihas i dirina sandiri, nungnga be dipataridahon ibana holong maradophon dongan joma doshon dirina.  

Alai tongtong do mananda si Mepiboset tu dirina, jala panandaon diri i dipatuduhon ibana do uju ro mangadop raja, manukkap do ibana tu tano marsomba ima pangalaho na pasangaphon sahalak raja, huhut didok tung ise ma pola ahu naposom, umbahen pola dompakhononmu biang na mate songon ahu on? Dang holan tu panangga be dipatudos si Mepiboset dirina, dohot do nang tu panangga naung mate. Ndang holan patut mangan sian lobilobi dirina dirajumi, alai dohot do tu naung mate jala naung dihasogohon ni manang ise pe, holan paima panganon ni akka gulok-gulok (belatung) i nama dirina dirajumi. Ndang mararga, ido tohap ni biang naung mate. Ndang adong halak na sari tu biang na mate, baliksa dihagigihon halak do biang naung mate dihatihai. Mardomu ma tu hagaleon ni pamatang ni si Mepiboset, songon sahalak na martihas ibana (secara fisik) na pangpang duansa patna  nangpe nian sasintongna na martihas do hita sude di adopan ni Debata. Molo di halak Israel jumpa sisongonon, dietong doi ala ni dosa ni natoras manang ompuna najolo. Jala somalna dipasiding doi sian parsaoran ni keluarga asa unang pailahon keluarga. Idaonta ma dison jumpang doi, ai di Lodebar do si Mepiboset di jabu ni si Makir ala dang adong be sisolhotna mangolu hatihai, ai nungnga mate be amana si Jonatan suang songoni ompuna si Saul. Jala sasintongna tihas na umbalga ndang na pala tihas ni pamatang alai tihas ni pangalaho do dohot penolakan na masa tu ibana dohot sude keluargana na mambahen panghilaanna dang tama ibana dapotan asi ni roha alai jumpangan asi ni roha do antong ibana sian raja Daud.

III.          Sipahusor-husoron

Dang dipaloas si Daud di bagasan hadangolon parngoluon ni si Mepiboset, alai dipatuduhon si Daud do antong holongnai siala denggan ni parale-aleon ni si Daud dohot si Jonatan (ama ni si Mepiboset) na dibangun nasida marhite holong na sian Tuhan i. Songoni do nang hita saluhutna, ganup do hita nungnga martihas songon si Mepiboset ala naung madabu hita tu bagasan dosa. Alai ro ma Debata songon si Daud na mangalului hita, manjou hita mangalehon padan ro di saleleng ni lelengna asa rap sapanganan hita di bagasan harajaon-Na. Jala dang alani haburjuonta manang haboionta alai holan ala asi ni rohaNa do dibagasan Kristus.  Thema ni minggutta mandok “marasiroha tu na martihas” naeng ma patuduhonon holong ni roha maradophon akka dongan sisongon i. Ai ndang lomo roha ni nasida manang natorasna sorang anakhonna tu portibion mardongan tihas. Alai naeng do papataron ni Debata huasoNa maradophon akka sisongoni asa tarida holong ni roha ni jolma i maradophon akka sisongoni alana mansai jotjot do halak sisongonon di tolak di na humaliangna/ dang dipardulihon. Ala ni i manghaholongi donganta jolma on ma na gabe tugas utama di hita ala naung parjolo do Debata manghaholongi hita alani na ikkon pataridahononta do antong holong i tu na humaliang hita. AMEN

Usulan Lagu

1. BE. No. 6: 1-2
2. BE. No. 121: 1+5
3. BE. No. 162: 1+3
4. BE. No. 186: 1-2
5. BE. No. 202: 1--
6. BE. No. 126: 1+4
7. BE. No. 518: 1--